ÚLTIMA HORA
Morren dez persoas ao descarrilar dous trens de alta velocidade en Córdoba
Tres vagóns dun Iryo saíron fóra da vía no termo municipal de Adamuz e bateron contra un Alvia
A circulación ferroviaria de alta velocidade entre Madrid e Andalucía quedou suspendida
O ministro de Transportes e Mobilidade Sostible, Óscar Puente, segue o operativo dende a estación de Atocha
Polo menos dez persoas morreron, 25 quedaron feridas e un número non precisado están atrapadas tras o descarrilamento de dous trens de alta velocidade no termo municipal de Adamuz (Córdoba).
Segundo fontes próximas á investigación, un tren Iryo descarrilou con 327 persoas a bordo sobre as 19:45 horas. Saíra unha hora antes de Málaga con destino á Porta de Atocha (Madrid).
Ao seu paso polo concello de Adamuz, os tres últimos vagóns saíron fóra do carril e invadiron a vía contraria pola que circulaba un Alvia con destino a Huelva.
Tras un impacto "terrible", segundo explica o ministro de Transportes e Mobilidade Sostible, Óscar Puente, dous vagóns do convoi de Renfe saíron despedidos.
Para atender o sinistro, o 061 despregou en Córdoba 5 Unidades de Coidados Intensivos móbiles do 061, vehículo de apoio loxístico e 4 DCCU (Dispositivo de Coidados Críticos de Urxencia).
Ademais, en Madrid, o Samur-PC púxose ao dispor de Adif/Renfe e desprazou á estación de Atocha un equipo con psicólogo e unha ambulancia básica por se acoden alí familiares.
Panel informativo na Porta de Atocha. EFE/Javier Lizón
Circulación suspendida
De acordo con ADIF, os trens afectados son o Iryo 6189 Málaga-Porta de Atocha e o convoi AV/AV 2384 Porta de Atocha-Huelva, tamén de longa distancia.
Por mor do sinistro, a circulación de trens de alta velocidade entre Madrid e Andalucía quedou suspendida.
Seguimento do sinistro
O ministro de Transportes e Mobilidade Sostible desprazouse á estación madrileña de Atocha para seguir desde o centro de emerxencias de Renfe o operativo.
"Atópome no H24 de Adif desde hai media hora seguindo a información do grave accidente ferroviario en Adamuz (Córdoba). Irei informando por aquí das novidades que estean confirmadas", escribiu Óscar Puente na súa conta de X ao redor das 21:20 horas deste domingo.
O presidente do Goberno, Pedro Sánchez, informou a través da rede social X que o Executivo está a traballar con outras autoridades competentes e cos servizos de emerxencia para auxiliar as persoas afectadas.
Familiares na estación de Huelva. EFE/Alberto Díaz
