Galicia reclama á UE levantar o veto ao palangre e alerta do posible recorte de xarda
A conselleira do Mar entrega documentación que avala o baixo impacto da arte
Villaverde manifesta preocupación polas previsións de redución de cotas en 2026
A conselleira do Mar, Marta Villaverde, trasladou ao comisario de Pesca e Océanos, Costas Kadis, documentación que avala o baixo impacto do palangre para pedir que se levante o veto a esta arte en 87 zonas do Atlántico Nororiental a partir de 2026.
Villaverde explicou en Bruxelas que a restrición afecta un cuarto da frota galega, cun impacto económico estimado de 216 millóns de euros anuais.
A conselleira pediu que estes datos se teñan en conta na revisión das propostas para abrir a porta a retirar o veto.
A titular de Mar mostrou preocupación polas previsións do Consello Internacional para a Exploración do Mar, que recomenda un recorte do 70% na xarda e do 41% no lirio de cara ás cotas de 2026.
Evento sobre a conserva no Parlamento Europeo
O eurodeputado Francisco Millán Mon organizou este martes un evento no Parlamento Europeo sobre a importancia da industria conserveira europea e os seus desafíos. O acto contou coa participación de Costas Kadis, Marta Villaverde e o secretario xeral de Anfaco-Cecopesca, Roberto Alonso.
Millán Mon destacou o peso da industria pesqueira en Galicia e sinalou que é esencial que Europa comprenda a relevancia do sector conserveiro para as rexións e comunidades costeiras.
A conselleira subliñou ademais que Galicia ten un papel relevante na industria conserveira por tratarse dun sector estratéxico para a comunidade e pola súa contribución á soberanía alimentaria.
