Galicia pide estabilidade de cotas pesqueiras e seguridade xurídica na UE
A Consellería do Mar remitiu as súas achegas á consulta pública aberta por Bruxelas sobre a pesca sostible na UE
Barcos no porto de Vigo nunha imaxe de arquivo. EUROPA PRESS/Adrián Irago
A Xunta pídelle á Comisión Europea que o esforzo da frota pesqueira galega por avanzar en sustentabilidade se traduza en estabilidade das cotas e seguridade xurídica para 2027.
A Consellería do Mar remitiu as súas achegas á consulta pública aberta por Bruxelas sobre a pesca sostible na UE, xusto cando Galicia ostenta a representación das comunidades nas reunións do Consello de Ministros de Agricultura e Pesca da UE (Agrifish).
Segundo defende, a xestión biolóxica dos recursos e a rendibilidade socioeconómica deben avanzar de xeito conxunto e reclama que se recoñeza o bo comportamento das pesqueiras do golfo de Biscaia e das augas ibéricas como modelos responsables.
Neste sentido, Galicia pide evitar recortes automáticos e indiscriminados de cotas cando a falta de recuperación de determinados recursos responda a factores ambientais ou a actividades non declaradas de terceiros operadores.
Tamén avoga por xeneralizar as sendas de recuperación plurianuais para evitar fortes oscilacións anuais e proporcionar maior estabilidade e previsibilidade a empresas e confrarías.
En materia de competitividade, a Xunta advirte do impacto da crise dos combustibles derivada da inestabilidade internacional e reclama fondos específicos para a modernización enerxética e novos mecanismos de cobertura de prezos.
Así mesmo, pide revisar o marco regulador da capacidade pesqueira para diferenciar entre o aumento do esforzo extractivo e os investimentos en arqueo e potencia destinadas exclusivamente a mellorar a seguridade e habitabilidade a bordo ou avanzar na descarbonización dos buques.
Unha gamela en Arcade. EUROPA PRESS/Adrián Irago/Arquivo
Igualdade ante as importacións
A posición galega pon tamén o foco na frota de grande altura e na renovación dos acordos de colaboración con terceiros países, alén de reclamar unha estrita igualdade de condicións para as importacións pesqueiras extracomunitarias.
En particular, a Xunta demanda que produtos como as conservas de atún procedentes de terceiros países cumpran os mesmos requisitos ambientais, sociais e de rastrexabilidade esixidos á frota europea, co obxectivo de evitar situacións de competencia desleal.
Ademais, Galicia propón reforzar a pesca artesanal e o marisqueo a pé, axilizar a homologación dos títulos dos traballadores do mar conforme o Convenio STCW-F e potenciar o papel da muller en toda a cadea pesqueira e transformadora.
Tamén reclama un control proporcionado da obriga de desembarque, baseado na selectividade e a prevención; garantir a coexistencia da pesca cos novos usos do espazo marítimo, e manter un fondo específico e sólido dentro do vindeiro Marco Financeiro Plurianual 2028-2034.
