Varias parroquias de Láncara quedan sen luz nin auga durante todo un día

A caída dunha árbore provocada por unha tormenta deixou sen luz varias parroquias de Láncara durante 22 horas. O corte, que tamén afectou á auga da traída, coincidiu coas festas patronais no núcleo máis afectado, polo que a veciñanza tivo que botar man de xeradores. E nunha casa de turismo rural, mesmo desluciu unha voda. 

"Entón, primeiro houbo que buscarlles lanternas e candeas. E despois, e raíz de irse a luz, ao pouco tempo tamén se foi a auga, porque aquí as bombas municipais funcionan con electricidade. Así que quedamos sen luz e sen auga", quéixase Marta López Álvarez, dona da Casa Grande de Láncara. 

"Houbo unha tormenta espectacular. Parecía o inferno. Parecía que ía acabar o mundo. E quedamos sen electricidade esta parroquia e as de arredor. Horas máis tarde, baleiráronse os depósitos de auga, ao non haber electricidade, e quedamos tamén se auga, polo que estivemos un pouco amargados na festa", láiase o gandeiro Óscar Rodríguez. 

Dende o primeiro momento, os usuarios estiveron a chamar a compañía eléctrica para dar aviso do corte. Unha vez restablecido o servizo, os negocios afectados anunciaron que van reclamar polas perdas e os gastos ocasionados. 

"Vou reclamar os gastos que me supuxo este corte de luz. Tiven que alugar un xerador, gastar o gasóleo para outro xerador nun tractor, para a gandería, e claro que penso reclamar por eses gastos", sinala Óscar. 

"Fálase moito de emprender e dinamizar o rural, e de ter a actividade económica no rural, pero para iso é necesario que os servizos respondan, e non é así", conclúe Marta. 

A caída de árbores tamén chegou a deixar cortada a estrada entre Láncara e Baralla.