Un barco permanece afundido no peirao de Portosín desde esta fin de semana
A embarcación, de madeira, levaba máis dun ano amarrada a porto
Desde a confraría de pescadores advirten da existencia doutros tres barcos ancorados sen actividade desde hai tempo
Inspección pesqueira perimetrou o lugar con barreiras de contención e absorción para intentar evitar que os residuos do barco afundido no peirao de Mariño, en Portosín, contaminen as augas.
"A verdade é que non tiña moito residuo que botar o barco", di o patrón maior, Isaac Gaciño.
A embarcación de madeira, duns doce metros de eslora, foise a pique esta fin de semana. Levaba un ano amarrada e sen actividade.
"Hai uns días estivemos mirando que parece que estaba moi baixo, parece que tiña unha vía de auga no interior. De Portos avisaron o antigo propietario e díxolle que o barco estaba vendido para Mauritania, que reside na Palmas de Gran Canaria", explica Gaciño.
Desde a confraría de pescadores temen que o cambio de propietario poida demorar o reflote do barco. Levaba máis dun ano amarrado e sen actividade.
"O barco leva vendido a este propietario desde agosto do ano pasado; se non veu antes por el, agora que vai pasar". "Se non Portos de Galicia terá que reflotalo, un barco afundido no peirao non é opcional", afirma.
En Portosín hai máis embarcacións que xa non saen pescar.
"Aquí temos tres, catro barcos sen actividade. Nós notificamos a Portos de Galicia e eles toman as súas medidas", apunta.
O patrón maior confía que no lugar onde se atope afundido o Sievil axiña comecen as obras do proxecto experimental de embarcadoiros para o cerco.
