Afúndese un barco na Costa da Vela, en Cangas, sen vítimas
Os tres tripulantes conseguiron saltar polo seu propio pé ás rochas sans e salvos
O barco embarrancou nunha zona de rochas que abriron varias vías de auga
O Atila, un pesqueiro con base en Cangas, quedaba sen goberno na Costa da Vela, preto da praia de Melide. Embarrancou e os seus tres tripulantes conseguiron saltar a terra. Entre as hipóteses do sinistro está a posibilidade de que a hélice se enganchase nalgún aparello. Foi necesaria a intervención dunha empresa especializada para reflotalo.
Miguel Lemat, xefe equipo da empresa UTM encargada da reflotación, explica que tiveron que "liberar dúas áncoras que o armador tirou pola borda para evitar que o barco fora máis contra as pedras e aumentase o dano. Liberamos o aparello que estaba arredor e os cabos que estaban liados na hélice".
A proximidade ás rochas permitiu que os tripulantes saltasen polo seu propio pé a terra, pero causou importantes danos no barco. Lemat detalla que "é unha zona de pedras, con laxas como coitelos, e o barco estaba totalmente afundido, tiña moitas vías de auga. Procedemos con boias e globos de elevación a darlle flotabilidade ao barco para retiralo das pedras".
Ata o lugar desprazáronse efectivos de Salvamento Marítimo, da Garda Civil e de Protección Civil, que non tiveron que intervir ao comprobar que todos os mariñeiros estaban ben. O Atila permanece no varadoiro do porto de Cangas á espera das inspeccións pertinentes e a reparación posterior.
