Desfiles, teatro e mercado medieval na multitudinaria festa da Istoria de Ribadavia

A festa da Istoria devolve Ribadavia á Idade Media... O sábado é o seu día grande.
A veciñanza e os visitantes somérxense no pasado para revivir, a modo de celebración, a historia do municipio. 

"Non me pode perder esta festa, hai que coidala, respectala e que a xente goce dos eventos da festa, os postos, o comercio local, os eventos, a obra do castelo que é unha pasada que sempre veño todas as mañás", di un dos veciños.

Con vestimentas que lembran o medievo e cos marabedís como moeda oficial da festa, é unha cita multitudinaria na que se fai indispensable a participación cidadá.

"Para nós é cita obrigada de todos os anos"

"Fixemos setecentos quilómetros onte e marchamos mañá pola mañá para Bilbao, ela é de Bilbao, eu son de Arbo, é a súa festa favorita de Galicia e a miña tamén"

"Hai que vir disfrazado senón non se pode entrar en moitas actividades", comentan algúns dos visitantes.

O Castelo dos Sarmiento e as rúas do barrio antigo de Ribadavia énchense esta fin de semana con desfiles, mercado medieval, teatro, cetrería, tiro con arco e a recreación dunha voda xudía e música... 

"É a festa do ano, eu son de aquí e é unha festa que forma parte de min"

"É a primeira vez que veño e estou explorando toda a vila, todos os eventos que fan, porque fan moitas cousas e moitas interpretacións, todo moi divertido", engaden outros participantes.

A Festa da Istoria foi declarada de Interese Turístico Nacional en 1997 e este ano converteuse unha vez máis nunha cita ineludible na última fin de semana de agosto para os que buscan diversión e tradición.