Un bar da Coruña vende mil rifas para unha cesta de Nadal valorada en 4000 euros
Entre os premios, un televisor de 55 polgadas, un móbil de última xeración e unha viaxe por Europa
O sorteo da cesta de Nadal de El De Manolín é todo un acontecemento no barrio dos Mallos. Ten todo o que se lle pode pedir a unha cesta de Nadal ben surtida... e moito máis.
"Cando abrimos empezamos facendo a típica cesta tradicional de tres pisos. Ao ano seguinte metimos unha tele, e ao seguinte unha caixa de aceite. Cada ano máis cousas", explica Manuel Cruz, propietario do local.
A deste ano está valorada en máis de catro mil euros e inclúe, entre outros agasallos, un televisor de 55 polgadas, unha fritidora de aire, un móbil de última xeración e un mes enteiro de menú do día gratis no propio bar.
Pero o premio máis cobizado é, probablemente, unha estancia de catro días en Roma, París ou Londres.
"Hai unha viaxe e claro, toda a xente anímase. Eu tamén estou animada, cunha rifa toca". "Quizais o que máis ilusión me fai é a viaxe, para desconectar un pouquiño cando se poida. Tamén os cartos en efectivo, porque nestas datas hai moitos gastos", comentan Merchi e Lorena, dúas clientas habituais de El De Manolín.
Manolín puxo á venda mil rifas que se esfumaron nunha semana.
O sorteo celebrarase o 19 de decembro. Os que non poidan estar, poderán velo en directo a través da conta de Instagram do local.
Será un día de celebración e de festa para toda a clientela deste bar que fai barrio na Coruña.
