Polonia investiga o tiroteo que causou seis mortes en Cracovia como terrorismo

Polonia investiga como acto terrorista o tiroteo perpetrado este sábado na praza do Mercado de Cracovia por un mozo polaco, de 24 anos,  presuntamente fascinado coa ideoloxía de extrema dereita.

Disparou indiscriminadamente dende un coche contra turistas e viandantes e asasinou seis persoas. Segundo a Fiscalía, probablemente tamén matou o pai, a nai e a irmá na casa familiar, onde apareceron os seus corpos.

O Ministerio Fiscal considera que os feitos constitúen un delito de carácter terrorista. No tiroteo morreron catro mulleres e dous homes, incluído un británico de 32 anos e unha austríaca de 51.

Ademáis, quedaron feridas 16 persoas, entre elas dous suboficiais da Policía que persegurion o agresor cando fuxía do lugar dos feitos, abatérono e detivérono. O sospeitoso atópase ingresado en estado crítico. 

Os axentes, celebrados como "heroes" por impedir que houbese máis mortes, espertaron este domingo dun coma inducido tras someterse a varias intervencións por feridas de bala. Un deles está grave. 

A maioría das vítimas son de nacionalidade polaca pero tamén hai xente de Alemaña, Rusia e Portugal. As autopsias das persoas falecidas comezan este luns.

Na mesma xornada empeza a análise forense dos cadáveres atopados na casa familiar do detido en Ostrowiec Świętokrzyski, a uns 110 quilómetros de Cracovia. Os corpos do pai, da nai e da irmá presentaban disparos.

Sospeitoso de nove mortes

Segundo a Fiscalía, as probas recompiladas "indican que ambos os dous feitos foron cometidos por unha mesma persoa", o detido identificado polos medios como Michał Ou., aínda que as autoridades aínda non facilitaron os seus datos nin os posibles motivos.

O que se sabe oficialmente é que vestía roupa de tipo militar, casco, chaleco antibalas e unha cámara para gravar o seu ataque, alén de portar un fusil semiautomático, outras armas e munición.

Tamén transcendeu que actuaba só, non tiña antecedentes penais, contaba con permiso de armas e non pertencía ás Forzas Armadas. Ademais, segundo o ministro do Interior, Marcin Kierwiński, estaba "fascinado con ideoloxías de extrema dereita".

Durante o rexistro do apartamento familiar, contabilizáronse sete armas de fogo e unha cantidade considerable de munición.

"Isto, sumado aos achados realizados en Cracovia, dános un total de once armas, unha cifra que coincide coas nosas investigacións sobre o número de armas para as que tanto o atacante coma o seu pai tiñan licenza", aínda que o mozo só tiña permiso para dous.

Non chamou a atención

A veciñanza describe a Michał Ou. como unha persoa tranquila, pouco faladora e que non chamaba a atención polo seu comportamento, segundo os medios polacos.

A súa familia, procedente do municipio de Waśniów, trasladouse a Ostrowiec Świętokrzyski hai algo máis de dez anos e non constan problemas de convivencia.

O detido formárase como tornero e acudía a campos de tiro, mentres que a súa irmá estudaba pintura na Academia de Belas Artes de Cracovia. O pai era electricista e a nai traballaba nun supermercado, segundo o medio Gazeta Wyborcza.