Prisión provisional para o suposto autor de catro roubos con forza en Padrón
O ladrón usaba unha ferramenta tipo pata de cabra para fracturar os peches dos establecementos
A Garda Civil detivo unha persoa como presunta autora de catro delitos de roubo con forza, cometidos en distintos establecementos dos municipios de Padrón e Dodro durante o mes de outubro.
Segundo o instituto armado, o ladrón actuaba principalmente en horario nocturno e utilizaba unha ferramenta tipo pata de cabra para fracturar os peches dos establecementos, especialmente portas e cristais, ocasionando "importantes danos materiais".
Dos catro feitos investigados, só conseguiu consumar un deles, no que subtraeu cartos do interior dun negocio. As investigacións realizadas pola Garda Civil permitiron identificar o presunto autor dos feitos e proceder á súa detención.
Unha vez finalizadas as dilixencias policiais, o arrestado pasou ao dispor da autoridade xudicial competente, que decretou o seu ingreso en prisión provisional.
