Morren cinco mozos en dous accidentes nas estradas españolas, ningún superaba os 25 anos
Na madrugada deste domingo morreron nun accidente en Cantabria tres mozos; tiñan 22, 23 e 25 anos e viaxaban xuntos nun turismo que deu varias voltas de campá
En Granada, morreron a primeira hora tarde dous mozos de 21 e 17 anos ao chocar o seu coche contra o muro dunha rotonda, cando volvían de xogar ao fútbol
Na fin de semana, morreron 9 persoas e dúas quedaron feridas en 8 accidentes de tráfico desde as tres da tarde do venres
Domingo negro nas estradas españolas. Cinco mozos morreron en dous accidentes de tráfico. Tres faleceron nun accidente en Cantabria e outros dous en Granada. Ningún superaba os 25 anos.
En Granada morreron este domingo dous mozos de 21 e 17 anos nun accidente de tráfico despois de que o turismo no que viaxaban chocara contra o muro dunha rotonda á altura de Huétor Santillán (Granada), de onde eran as vítimas. O Concello da localidade decretou tres días de loito oficial.
O sinistro ocorreu sobre as 13:40 horas na estrada A-4003, na rotonda que sobe ás canteiras, segundo o centro coordinador de emerxencias 112.
Testemuñas do accidente alertaron de que un coche batera contra o muro dunha rotonda e solicitaron asistencia sanitaria urxente para os seus dous ocupantes, que estaban atrapados e feridos graves, un deles en parada cardiorrespiratoria.
Ao lugar acudiron a Garda Civil de Trafico, os Bombeiros de Granada e efectivos sanitarios, que mobilizaron dúas UVI móbiles, ademais da agrupación de voluntarios de Protección Civil de Huétor Santillán.
Os dous ocupantes finalmente faleceron, segundo as fontes sanitarias.
Dáse a casualidade que esta poboación, de menos de 2.000 habitantes, xa perdera nun accidente de tráfico outros tres mozos, no ano 2007; un deles tamén era menor de idade. O accidente producírase no mesmo punto da estrada que o deste domingo.
Lugar do accidente no que morreron os dous mozos en Granada. Imaxe: EFE
Tres mozos morren de madrugada nun accidente de tráfico en Cantabria
Os tres mozos mortos no accidente rexistrado en Cabezón de la Sal viaxaban xuntos nun turismo e tiñan 22, 23 e 25 anos. O accidente ocorreu contra as doce e media da noite, na estrada nacional 634.
Ao volante ía o máis novo. Por razóns que se están investigando, perdeu o control do vehículo, que subiu primeiro a unha illa, deu logo varias voltas de campá para acabar parando no aparcadoiro dun restaurante.
Os bombeiros tiveron que intervir para sacar do coche o rapaz que ía na parte de atrás. Rescatárono aínda con vida, pero faleceu cando estaba sendo auxiliado polos servizos sanitarios.
Dous dos mozos vivían en Cabezón de la Sal e o terceiro residía no concello lindeiro de Mazcuerras. As dúas localidades decretaron tres días de loito oficial.
Os familiares dos falecidos foron atendidos por psicólogos do goberno de Cantabria. A presidenta da comunidade transmitiulles as súas condolencias a través das redes e subliñou que a perda dos tres rapaces é un golpe para toda Cantabria.
Ao longo da fin de semana, desde as tres da tarde do venres, morreron 9 persoas nas estradas españolas e dúas quedaron feridas.
