Cae unha banda que roubou en polo menos 38 vivendas do norte peninsular, varias delas na provincia de Lugo

A Garda Civil, no marco da operación Spyhole, desartellou un novo grupo criminal especializado que asaltaba vivendas en diferentes provincias. En total atribúenselle polo menos 38 roubos e un prexuízo económico ás vítimas estimado en 150.000 euros. O grupo criminal tiñan establecida a súa base de operacións na Comunidade de Madrid, desde onde se trasladaban a diferentes comunidades e tras asaltar varias vivendas en cada provincia regresaban ao seu domicilio ocultando as xoias en caletas e dobres fondos dos vehículos. A investigación arrincou, cando se tivo coñecemento por parte de Garda Civil de varios roubos en localidades lucenses en vivendas habitadas. O traballo dos investigadores viuse obstaculizado por diversas estratexias que o grupo empregaba para evitar a persecución policial.

Modus operandi

Asaltaban as últimas plantas dos edificios e sempre en horario diúrno, fracturando o sistema de peche das portas que dan acceso ao interior da vivenda e extraendo da mira. Actuaban empregando unha sofisticada planificación, na que analizaban tanto as medidas de seguridade das vivendas como as rutinas dos seus moradores.

Durante os asaltos, os integrantes do grupo criminal ocultaban os seus rostros, vestían con cores escuras e usaban luvas. Só se interesaban por diñeiro, xoias e obxectos de luxo que puidesen transportar facilmente en mochilas ata un vehículo de apoio que os agardaba no exterior das vivendas.

Unha vez cometían un feito delituoso poñían rapidamente á venda os obxectos de valor subtraídos, entre os cales se atopan xoias que, ademais do seu valor económico, tiñan gran valor sentimental para os seus propietarios.

Planificación dos golpes

Os vehículos utilizados pertencían a unha compañía que ofrece servizos de subscrición a través da súa plataforma dixital, cuxa beneficiaria do contrato era unha segunda empresa, non vinculada directamente coa banda, o que lles daría impunidade aos autores. Debido ás investigacións realizadas, cambiaran de metodoloxía usando vehículos a nome de terceiras persoas. Para comunicarse durante o transcurso dos roubos, facían uso de números de teléfonos de abonados a nome de terceiras persoas vinculadas á súa contorna familiar, que renovaban frecuentemente para dificultar a investigación policial.

Explotación da operación

Tense coñecemento de que a banda volvía á base tras asaltar tres vivendas na provincia de Biscaia, polo que se activa un operativo policial en Briviesca (Burgos) onde se deteñen aos tres integrantes da trama e se incautan de diversos obxectos subtraídos, así como de material utilizado para a comisión dos ilícitos. Entre os obxectos intervidos atópanse numerosas pezas de ouro (pendentes, cordóns, colgantes, pulseiras, aneis, xemelgos), un reloxo de alta gama, moedas de colección (dúas delas cun prezo unitario de 3.500 e 2.200 euros) e diñeiro en efectivo procedente dos últimos roubos efectuados. Aos detidos impútanselles os delitos de pertenza a grupo criminal e delito continuado de roubo con forza no interior de vivendas habitadas. Os tres foron postos a disposición do Xulgado de Instrución nº 1 de Mondoñedo (Lugo), que decretou o seu ingreso en prisión.