Detida en Vilagarcía unha parella que roubaba a homes mentres ela mantiña relacións sexuais con eles

A Policía Nacional detivo en Vilagarcía de Arousa unha parella acusada de cometer numerosos roubos con violencia, algúns deles mentres a muller mantiña relacións sexuais coas vítimas e o seu compañeiro aproveitaba para roubarlles o diñeiro.

Segundo a comisaría provincial, este era un dos principais métodos que empregaban e atribúenselles polo menos doce asaltos. Os investigadores consideran que están detrás da maior parte dos roubos con violencia rexistrados na localidade nos últimos meses.

En varias ocasións, a muller concertaba encontros sexuais voluntarios cos homes e, nese momento, aparecía o seu marido, que os ameazaba cunha navalla para levarlles o diñeiro. En moitos casos utilizaron armas brancas e chegaron a causar feridas ás vítimas.

Nuns dos últimos asaltos, en setembro, abordaron un mozo ao que empuxaron cara a unha calella e ameazárono cun coitelo para que entregase o diñeiro. Cando intentou escapar, cortárono nun costado e golpeárono repetidamente. Ao día seguinte atacaron outro mozo por detrás, déronlle un puñazo e roubáronlle o diñeiro e o teléfono móbil.

A Policía detivo a parella o pasado 15 de outubro e, tras pasar a disposición xudicial, quedaron en liberdade con cargos mentres continúa a investigación.