Tres detidos en Lugo por roubar 4.500 metros de cobre da A-6 e vendelo a terceiros

A Garda Civil, no marco da operación Tuteva, detivo tres veciños de Lugo, de 27, 31 e 42 anos, como supostos autores dos delitos de roubo, furto e pertenza a grupo criminal, ao apropiarse ilicitamente de 4.500 metros de cable de cobre e numerosas ferramentas, e posteriormente vendelo.

Os feitos desenvolvéronse entre os meses de maio e xullo, cando os presuntos autores subtraeron, ata en cinco ocasións, cable de cobre procedente das obras de mellora que está a efectuar o Ministerio de Transportes nos túneles da Autovía do Noroeste (A-6).

Os detidos vendían o material subtraído polo "método do goteo" en establecementos de tratamento de residuos de fóra da provincia de Lugo, utilizando para o seu traslado "diferentes vehículos e a terceiras persoas", todo iso "coa finalidade de dificultar a investigación policial e eludir a acción da xustiza".

Os axentes da Benemérita interviñeron unha furgoneta cargada con 900 quilogramos de cobre e parte das ferramentas subtraídas, cando "regresaban supostamente" dun dos furtos.