Investigan un veciño de Arzúa por apropiarse de 65.000 euros dun ancián con problemas de memoria
O investigado, de 63 anos, foi visto co ancián nunha entidade bancaria retirando diñeiro
O sobriño da vítima foi quen puxo a denuncia, logo de ver os movementos na conta do ancián
Arquivo
A Garda Civil de Arzúa abriu unha investigación contra un veciño do concello de 63 anos por un presunto delito de apropiación indebida.
Segundo a Benemérita, o acusado retirou da conta bancaria dun home de 84 anos e con problemas de memoria ata 65.450 euros nos dous últimos anos.
A investigación iniciouse por mor dunha denuncia presentada polo sobriño da vítima. Un familiar do ancián observou ao investigado e á vítima nunha entidade bancaria retirando importantes cantidades de diñeiro.
Este familiar comentou os feitos co sobriño da vítima, cuxo pai é cotitular da conta do ancián e puido verificar os grandes movementos feitos na conta do ancián.
O diñeiro retirado non se correspondía cos gastos habituais do home, que vive só e ten problemas de memoria, e as dilixencias foron remitidas ao Xulgado de Instrución de Arzúa.
