Á prisión un membro da banda que asaltaba casas en Beariz e Avión tras ser extraditado desde Bélxica

Un cidadán de nacionalidade albanesa, membro da banda que asaltaba vivendas nos concellos ourensáns de Beariz e Avión, ingresou en prisión tras ser extraditado desde Bélxica.

A súa detención e extradición foi posible grazas á cooperación entre a Unidade Orgánica de Policía Xudicial da Comandancia da Garda Civil de Ourense, Europol e Interpol.

Atribúenlle 14 roubos e un botín de 500.000 euros en xoias e diñeiro

O detido está vinculado con polo menos 14 roubos cometidos nestes municipios ourensáns.

Os feitos están relacionados coa operación Vértigo, desenvolvida en maio, na que foron arrestados oito membros dun grupo criminal que actuaba en vivendas habitadas da provincia de Ourense.

Na investigación, a Garda Civil interveu pistolas, 2.100 plantas de marihuana e un botín que suma uns 500.000 euros en xoias e diñeiro, tras varios rexistros realizados en Barcelona, Tarragona e Castelló.

O Tribunal de Instancia de Sección única de Ribadavia emitiu unha orde europea e internacional para a detención e extradición do sospeitoso, que foi finalmente entregado polas autoridades belgas o 7 de agosto.

Este venres o detido pasou á disposición xudicial no Xulgado de Ribadavia, que decretou o seu ingreso en prisión comunicada sen fianza.