En Aguiño degustan 450 quilos de navallas na novena edición da festa que dedican ao molusco
A ración, de máis de 400 gramos, véndese a trece euros
A festa congrega máis dun milleiro de persoas
Aguiño presume do seu marisco. Desta volta concretamente das navallas.
"A ría esta nosa é a que mellor navalla ten, a que ten mellores ameixas, nécoras, polbo... É a máis rica que te podes imaxinar", asegura Pilar Millé, da comisión de festas de Aguiño.
Na localidade andan á navalla unhas trintena de embarcacións.
"Aquí cóllese toda mergullando, a unha media de dous mergulladores por embarcación. Traballa moita xente. Véndense diariamente na lonxa de Aguiño 500 quilos", explica o presidente da comisión de festas.
Nesta novena edición da festa recolleron 450 quilos de navallas para saír en racións de máis de 400 gramos. Entre doce e catorce pezas a 13 euros.
"É a mellor navalla que hai no mundo. Non a come nin o rei porque cando chega a Madrid xa non está como aquí, acabada de pescar e á grella", afirma Pilar.
"Pódense comer ata crúas. Non é preciso nin cociñalas. O produto bo hai que facelo o mínimo posible", asegura Julio.
Na festa prepáranse ao xeito tradicional, á prancha. Son navallas de tamaño medio, que segundo nos explican son as máis brandiñas. Están no punto nun abrir e pechar de ollos.
"En canto as botas e empezan a abrir, dáslles a volta e en dez segundos ou quince sácalas que están listas", conta Manolo Romano, membro tamén da comisión de festas.
O encontro atraeu máis dun milleiro de persoas, tanto autóctonos coma foráneos. Entre os que chegaran xa á mesa co manxar a opinión era unánime: boísimas.
