Milleiros de persoas enchóupanse na Festa da Auga de Vilagarcía
A Festa da Auga, declarada de Interese Turístico Nacional, comezou a celebrarse de xeito espontáneo en 1984
Despois dos vivas a San Roque, con este primeiro caldeiro comezou a Festa da Auga de Vilagarcía.
"É a mellor festa do mundo, sen dúbida ningunha". "Hai moitísima xente", din dúas veciñas de Vilagarcía que participan na festa.
A Festa da Auga comezou hai 41 anos, cando trasladaban o San Roque á súa capela. Nun día de calor, os que levaban a imaxe do santo ao lombo comezaron a pedir auga
"Comezaron a pedirlles aos veciños que por favor lles botasen un pouco de auga, que ía moita calor. Debeulles parecer moi divertido e cada ano comezou a acompañalos máis xente e máis xente. Máis de 40 anos despois converteuse no que é a día de hoxe", explica a concelleira de Cultura e Festas de Vilagarcía, Sonia Outón.
Desde entón a Festa da Auga atrae cada 16 de agosto milleiros de persoas, a maioría de Vilagarcía, pero tamén moitas de fóra.
"Gústame todo desta festa", di unha turista francesa.
"Agora imos intentar mollarnos". "Aínda vou seco, estou esperando a ver se me mollan", comentan dous asistentes pouco despois de comezar a festa.
A San Roque fixérono bailar como un máis da festa, pero por ser o patrón de Vilagarcía foi o único que non saíu mollado.
