Reparten auga potable no concello da Rúa, afectado polo lume

Na cantina da estación de tren da Rúa voluntarios reparten botellas e garrafas de auga mineral doadas por comercios e empresas. Tamén chega material a través da Cruz Vermella e a UME.

O Concello advirte de que os veciños non deben beber nin cociñar con auga da billa, e así habilitaron este punto de recollida. Unha voluntaria explica que reparten a auga en función do número de persoas que hai en cada casa, e un veciño que foi recoller di que non deben beber a auga da traída.

O Concello da Rúa informou de que non ten capacidade para potabilizar de xeito eficiente a auga da traída, atribuíndollo ao gran consumo de auga preciso para a extinción do incendio e pola cantidade de residuo depositada no aire.

A alcaldesa recoñece que esta situación irá para tempo. Di que lles pediron paciencia, que o incendio do vertedoiro afecta tamén o concello, e reitera que a auga da traída pode usarse para hixiene, pero non para consumo. Hai veciños que foron buscar auga con máscara.

Tamén reparten a domicilio, ás persoas que non poidan desprazarse. A maiores, o Consorcio de Augas de Valdeorras habilitou dúas fontes no concello do Barco, unha no polígono da Raña e outra na parroquia de Viloira, para abastecemento de toda a contorna.