Trece detidos en España por introducir cocaína en contedores de froitas dende Ecuador
Trece detidos en España por introducir cocaína en contedores de froitas dende Ecuador
Forman parte dunha rede internacional á que se lle interviñeron máis de 3.400 quilos de droga, 200 no porto de Alxeciras
Outras 18 persoas foron detidas en Ecuador e unha, no Reino Unido
A Policía Nacional e Vixilancia Aduaneira da Axencia Tributaria, en colaboración coa Policía Nacional de Ecuador, desmantelaron unha presunta organización criminal dedicada ao tráfico internacional de cocaína desde o país latinoameriano e ao branqueo de capitais usando unha complexa trama empresarial.
A rede introducía a droga oculta en contedores de froita. Segundo comunicou este venres a Policía Nacional, entre 2019 e 2022, interviñéronselle 3.210 quilos de cocaína en diferentes países e 200 no porto de Alxeciras (Cádiz).
Ademais dos 13 arrestados en España (sete en Málaga, dous en Barcelona, dous en Madrid, un en Cádiz e un en Valencia) outras 18 persoas foron detidas en Ecuador e unha no Reino Unido.
Nos 22 rexistros realizados nas provincias de Málaga, Barcelona, Granada, Madrid, Valencia, Cádiz e Sevilla incautáronse case 500.000 euros en efectivo, máis de 12.000 dólares, diñeiro en metálico doutras moedas estranxeiras, 12 vehículos, reloxos de alta gama, terminais móbiles e material informático. Tamén se inmobilizaron inmobles por un valor aproximado de 12 millóns de euros, se bloquearon 88 produtos financeiros e interviñeron por vía xudicial catro empresas.
🚩Desarticulada una organización criminal dedicada al tráfico internacional de #cocaína en contenedores de fruta en una operación conjunta
— Policía Nacional (@policia) February 16, 2024
Se ha detenido a 32 personas, 13 en #España, 18 en #Ecuador y uno en #ReinoUnido y se han practicado 22 registros en nuestro país pic.twitter.com/rY3E8zNwOe
En Ecuador interviñéronse máis de 2.300.000 dólares, nove vehículos e armas de fogo. Tamén se inmobilizaron 22 inmobles e múltiples produtos financeiros e interviñéronse seis entidades xurídicas, o que permitiu detectar un patrimonio branqueado de 36 millóns de euros.
Máis de 800 axentes formaron parte do operativo policial posto en marcha a raíz dunha investigación, sufragada con fondos da Comisión Europea, que se iniciou en 2020 e que continúa aberta.
