Transportes inicia este luns as obras de rehabilitación de 60,4 quilómetros da A-6, entre O Corgo e Guitiriz

O Ministerio de Transportes e Mobilidade sostible iniciará este luns á primeira hora da mañá as obras de rehabilitación de algo máis de 60 quilómetros na autovía A-6, entre os quilómetros 480 (O Corgo) e 540,440 (Guitiriz), uns traballos cun investimento de 26,4 millóns de euros.

As primeiras actuacións levaranse a cabo nos municipios do Corgo e Lugo, o cal implica afectacións ao tráfico na calzada esquerda (sentido Madrid), entre os quilómetros 477,245 e 494,400. Con esta actuación preténdese corrixir as deterioracións que presenta o firme e mellorar así a seguridade viaria e as condicións de circulación.

Para garantir a seguridade dos traballadores e usuarios, desde este luns ás 09:00 horas, e ata o 4 de decembro, iranse realizando cortes por tramos da calzada esquerda (sentido Madrid) da autovía A-6, nese tramo. Para asegurar a fluidez do tráfico durante a devandita afectación, habilitaranse pasos pola mediana para que circule todo o tráfico pola calzada dereita en sentido A Coruña.

Esta calzada da autovía operará así en modo bidireccional cun carril habilitado por sentido de circulación, coas seguintes fases e duracións aproximadas: a fase 1, desde o 15 de setembro ás 09:00 horas ata as 24 horas do 24 de setembro, entre os quilómetros 487,1 e 483,2; fase 2, desde as 09:00 horas do 22 de setembro ata as 24 horas do 7 de outubro entre os quilómetros 483,2 e 480,4; a fase 3, desde as 09:00 horas do 6 de outubro ata as 24 horas do 14 de outubro entre os quilómetros 480,4 e 477,245.

Durante esta terceira fase procederase ao corte dos ramais de entrada e saída á autovía A-6 en dirección Madrid, na ligazón do km 479, e deberá anticiparse a saída da autovía á ligazón do km 488 e pospoñerse a incorporación á autovía á ligazón do km 469. A fase 4 será desde as 09:00 horas do 13 de outubro ás 24 horas do 4 de novembro entre os quilómetros 494,400 e 491+3, e a fase 5, desde as 09:00 do 3 de novembro ás 24:00 do 4 de decembro entre os quilómetros 491,3 e 487,1.

A obra ten un orzamento de 26,422 millóns de euros e o seu obxectivo é o fresado das capas de firme e a reposición en tramos con deterioración estrutural. Así mesmo, levarán a cabo outras actuacións, como saneamentos puntuais do firme alí onde se detecte un esgotamento estrutural que afecte á chaira; tratamento de gretas; reposición da sinalización horizontal e balizamento; reposición de xuntas de dilatación en estruturas; impermeabilización de taboleiros de estruturas; reposicións de servizos afectados de aforos, e outras obras complementarias.