Tráfico intensifica os controis nas estradas na operación retorno
Desde o inicio da operación retorno das vacacións o venres pasado ata este domingo, a DXT calcula máis de 5 millóns de desprazamentos en toda España, deses un 14 por cento prodúcese en Galicia, é dicir, máis de 700 mil viaxes
Prevese que o maior número de desprazamentos se concentre entre as catro da tarde e as once da noite
A Garda Civil de Tráfico recomenda circular con precaución e respectando as normas
Ante a operación retorno das vacacións a Garda Civil de Tráfico reforza os controis nas estradas galegas neste último día de agosto.
Tráfico aumenta os operativos de 24 horas... con controis de velocidade ou de detección de consumo de alcohol ou drogas.
"Co aumento dos fluxos circulatorios nestas datas o que reforzamos é precisamente os servizos clásicos de domingo, sobre todo en zonas próximas a grandes núcleos de poboación. A mañá está sendo bastante fluída", destaca o tenente Francisco Javier López Dopico, xefe do destacamento da Garda Civil de Tráfico de Ferrol.
O fluxo circulatorio aumenta considerabelmente, sobre todo en zonas e horas moi concretas.
"Está previsto que as horas da tarde, desde as catro da tarde ata as once da noite, é cando poida aumentar ese fluxo circulatorio, nas clásicas vías principais como pode ser a AP9, a A6, a A8, A52 e A55, polas zonas de Ourense, circulación procedente da Meseta e doutros puntos de España", engade.
Desde o inicio da operación retorno o venres pasado ata este domingo a DXT calcula máis de 5 millóns de desprazamentos en toda España, deses un 14 por cento prodúcese en Galicia, é dicir, máis de 700 mil viaxes.
"Na estrada hai que ir sempre con coidado e cantos máis controis haxa a xente é máis precavida"
"Agora marcho a Toledo e paso por Madrid, alí vou ter bastante tráfico, xa no Nadal me pasou o mesmo, vou intentar evitar o que poida", din algúns condutores.
Ante o aumento dos desprazamentos por estrada nesta xornada, Tráfico recomenda conducir con precaución, respectando sempre os límites de velocidade, usando os sistemas de seguridade, marcando períodos de descanso ao volante en viaxes longas, absténdose de consumir alcohol e drogas e evitando distraccións como o uso do teléfono móbil. Todas estas medidas son cruciais para chegar ao destino san e salvo.
Tamén se reforza o tráfico ferroviario
Renfe reforzou os seus servizos durante esta operación retorno. 4.350 trens circulan polas vías desde o venres ata o remate do luns, según informou Adif.
O servizo refórzase tanto na alta velocidade como longa e media distancia e as estacións de Madrid e Barcelona serán as de maior tráfico. Agárdase que polas dúas terminais madrileñas cheguen e saian 1.510 convois e na de Barcelona 476.
Este domingo as estacións galegas tamén rexistraron un maior número de pasaxeiros.