Terceiro triunfo dun Racing imparable que se mantén no máis alto

Tres partidos e tres vitorias do Racing, que aguanta o ritmo do Córdoba á fronte da Primeira Federación. Volveu amosar o cadro departamental as virtudes deste comezo de campionato. Fixo un partido moi serio en defensa e atopou o gol do triunfo ao comezo da segunda parte. 

Foi nun erro groseiro do porteiro local Falcón, que se trabucou nunha saída de xogo e entregou o balón a Héber Pena. O extremo racinguista non desaproveitou o agasallo e marcou cunha gran vaselina. 

Apertou o San Fernando á procura do empate, pero o Racing resolveu todas as dificultades defensivas. A expulsión de Farrando a dez minutos do final acabou coa insistencia andaluza.