Tempo de transplantar e de podar árbores froiteiras

Maceiras, pereiras, cerdeiras e outras árbores froiteiras agardan nos viveiros de todo o país para ser transplantadas por estas datas. O mesmo ocorre cos cítricos, en especial na costa, ou cos arbustos de froito, coma as vides, os kiwis ou os arandos.

"Agora, neste tempo, pódese plantar calquera árbore froiteira. Sobre todo a raíz espida, porque vai mellor que as de maceta, Non lle afecta nin o frío nin nada, e prende mellor", explica Manuel González Pena, xerente de Verdilugo. 

Tamén é tempo de poda destas árbores. Quen non o fixera na última lúa minguante, pode agardar ata a seguinte, co fin de que as pólas non medren demasiado. Doutra banda, na horta pódense plantar verduras de inverno, como allos ou porros, mentres que as sementes dalgunhas hortalizas xa se poden preparar nos sementeiros.

"Directamente, pódese plantar o allo, o repolo, a leituga, algunha cebola, o allo porro, o brócoli ou a coliflor. A para semente, pódese meter o chícharo, o tirabeque ou a cebola", engade o xerente da tenda de plantas luguesa. 

Tocante aos invernadoiros, tamén se poden plantar leitugas, coliflor ou brócoli. Para outras hortalizas, coma o pemento ou o tomate, aínda haberá que agardar ata a primavera.