O mal tempo atrasa a colleita dos pementos de Herbón
Desde o Consello regulador agardan que os primeiros exemplares cheguen aos mercados a finais de mes
"Collín catro por aquí nunhas plantas, colles 40 ou 50 pementos para comelos ti".
A presidenta do Consello regulador da Denominación de Orixe Pemento de Herbón, Milagros González, di que polo momento hai poucos pementos nos invernadoiros de Herbón.
A campaña comezou con atraso no inverno, xa que o exceso de choiva fixo que se sementara máis tarde do habitual. Normalmente comezan a finais de febreiro, pero este ano tiveron que facelo dúas semanas despois.
"O tempo está afectando moito esta campaña, cun atraso como mínimo de 15 días. Non está favorecendo nada que as plantas medren, boten flor e calle o froito", asegura a presidenta do Consello regulador.
As previsións indican unha melloría do tempo a partir de mediados da próxima semana. Desde o Consello regulador agardan que a finais de mes xa haxa pementos de Herbón nos mercados.
"Eu espero que a finais de maio xa teñamos unha produción decente para estar nas tendas. Aínda que xa hai algunha bolsiña por aí, como produción esperamos que a finais de maio teñamos algo", explica Milagros González.
O ano pasado produciron arredor de 85.000 kilos baixo a Denominación de Orixe Protexida Pemento de Herbón, que agrupa 26 produtores.
No da cooperativa A Pementeira, a maior parte da produción vai para grandes distribuidoras, pero cada vez teñen mais pedidos online que venden directamente a particulares.
