Afeccionados a horticultura e a xardinería xúntanse na Feira de Cultivos do Baixo Miño
A feira celebrouse con dúas semanas de agtraso por causas meteorolóxicas
Nesta edición houbo unha ducia de cursos e obradoiros
Con dúas semanas de atraso debido ao mal tempo, volveu a Feira de Cultivos do Baixo Miño.
"Temos un montón de postos de artesanía pero sobre todo oproduto estrela son as plantas. Aquí somos produtores por excelencia de planta de todo tipo", explica Nuria Castro, pres. de acuBam, organizadora da feira.
Quizais porque a estas alturas xa están as hortas postas, os compradores buscaban variedades con flor para adornar os xardíns e as terrazas.
"Creo que é un eucalipto, pero non é do que arrincan, este é de xardín"."Precioso, encántanme as plantas. Tráigoa aquí para que se recree con todo isto. Para relaxarnos"."Non a coñecía, vina en Instagram e vimos desde Portugal ata aquí", contan varios compradores.
"O que máis se vende, vai por modas, a lavanda, o eucalipto para adornos, as dalias. Volvemos ás flores antigas como a flor de papel, os pendentes da raíña", dilucida unha vendedora.
A feira é unha cita importante para os produtores de planta e para os afeccionados á xardinería e á horticultura.
"Polo que máis pregunta o público é por plantas aromáticas, por produtos ecolóxicos, como os abellóns porque todo o mundo está bastante concienciado de non utilizar tanto fitosanitario", precisa un vendedor.
Nesta edición, organizáronse máis de trinta actividades paralelas. Entre elas, cursos e obradoiros onde aprender técnicas innovadoras para cultivar e coidar as plantas.
