O Concello de Chantada é un referente no mantemento de parques e xardíns
O municipio leva oito anos conseguindo o máximo galardón do certame Vilas en Flor
Máis de 35 hectáreas de zonas verdes, seis parques infantís e tres parques biosaudables conforman un dos puntos fortes do concello de Chantada.
"Aquí dicíase que vivíamos de costas ao río Asma e empezamos a ver cousas noutros concellos e empezamos a facer paseos fluviais e a traballar arreo", explica o alcalde de Chantada Manuel Lorenzo.
Na vila levan anos apostando polas zonas verdes. Arranxan parques, recuperan árbores autóctonas e mesmo crean novos espazos onte antes había asfalto.
"Pequenos espazos que non son urbanizables transformámolos en zonas verdes nos que os veciños poidan pasar tempo de lecer", sinala o concelleiro de Parques e Xardíns, Diego Otero.
O cadro de traballadores de parques e xardíns conta con catro persoas ao que se suman convenios con obradoiros de emprego. Entre todos conseguen espazos de lecer que conquistan a todos.
"Está bastante coidado e límpano ben". "Téñeno ben e moi coidado". "Son espazos que a xente aproveita, para min é sen dúbida o mellor da vila".
Aquí nada queda ao azar, contan con viveiros e invernadoiros propios, constrúen as súas propias xardineiras e engalanan con flores as rúas peonís onde non hai xardíns.
