Nove xardíns galegos están integrados no itinerario histórico de Europa
Galicia entra no selecto club do itinerario histórico de Europa pola súa riqueza botánica e arquitectónica
Esta rede está formada por 41 espazos de diferentes países
Nove xardíns galegos están integrados no itinerario histórico de Europa, unha rede conformada por 41 espazos verdes de 10 países diferentes que destacan pola súa riqueza natural paisaxística, histórica e arquitectónica. Un itinerario que se creou hai dez anos para por en valor un patrimonio único que tamén forma parte dos itinerarios culturais europeos.
"Formar parte desta rede de xardíns históricos de Europa é un honor e é unha oportunidade para poder transmitir todo o que estamos facendo nos xardíns do Pazo Quinteiro da Cruz, tanto na parte cultural, na de sostentibilidade, como na parte de resiliencia que desde o Consello de Europa queren que se transmita ás persoas que veñen visitarnso ao longo de todo o ano", di Beatriz Piñeiro, unha das donas do Pazo Quinteiro da Cruz, en Ribadumia.
A Alameda de Santiago, os xardíns do Pazo de Oca ou os do pazo de Santa Cruz de Ribadulla son algúns destes espazos nos que a natureza convértese en arte, grazas ao traballo de xeracións de xardineiros que levan séculos coidando destes xardíns históricos.
"É un lugar onde podes gozar dos cinco sentidos, onde oes paxaros, todo tipo de texturas, de aromas, dun xardín con alma de museo", engade.
Centos de variedades de camelias, labirintos de buxo e todo tipo de árbores e plantas en flor conforman a identidades destes xardíns que dan boa mostra do nivel desta arte en Galicia.
