Os EUA atacan obxectivos no sur de Irán
O Comando Central das Forzas Armadas fala de ataques en lexítima defensa para protexer as súas tropas das ameazas que representan as iranianas
Entre os obxectivos, menciona plataformas de lanzamento de mísiles e embarcacións que -di- tentaban colocar minas
As forzas estadounidenses levaron a cabo este luns ataques en defensa propia no sur de Irán dirixidos contra sitios de lanzamentos de mísiles e embarcacións iranianas, informaron medios estadounidenses citando fontes do Comando Central das Forzas Armadas estadounidenses (CENTCOM).
Timothy Hawkins, portavoz do CENTCOM, dixo a Fox News que o ataque se deu en lexítima defensa para protexer as tropas estadounidenses das ameazas expostas polas forzas iranianas. "Entre os obxectivos incluíanse sitios de lanzamento de mísiles e embarcacións iranianas que intentaban colocar minas", engadiu o portavoz.
Así mesmo, as forzas responderon ao que parecía ser que un emprazamento de mísiles tomase como obxectivos avións de combate estadounidenses, segundo unha fonte da administración do presidente Donald Trump citada pola televisora. O presidente Donald Trump autorizou previamente as forzas estadounidenses a responderen as provocacións iranianas ao redor da estratéxica vía fluvial.
Hawkins subliñou: "O CENTCOM continúa defendendo ás nosas forzas, á vez que exerce contención durante o cesamento do fogo vixente". Os ataques nos arredores do estreito de Ormuz danse xusto cando os Estados Unidos e Irán intensificaron nos últimos días os seus contactos e ultiman os detalles dun acordo que permitiría poñer fin á guerra.
A Casa Branca confía en que poida pecharse nos próximos días, aínda que Teherán afirmou este luns que non é inminente. Segundo filtracións á prensa, o pacto incluiría a reapertura do estreito de Ormuz e o levantamento de sancións a Irán, pero deixaría o dossier nuclear para unha fase posterior, o cal xerou críticas de varios senadores republicanos aliados de Trump.
