Os Estados Unidos retiran a Siria da lista de "estados patrocinadores do terrorismo"
Tamén deixan de considerar a Hayat Tahrir al-Sham, liderada no seu día polo actual presidente sirio, como "organización terrorista global"
Un membro do antigo grupo Hayat Tahrir al-Sham á beira dunha imaxe de Bashar al-Assad. REUTERS/Yamam Al Shaar
Os Estados Unidos retiraron este luns a Siria da lista de países patrocinadores do terrorismo na que estaba incluída desde 1979 e tras o restablecemento de relacións entre os dous países en 2025.
"Hoxe, autoricei a revogación formal da designación de Siria como Estado patrocinador do terrorismo (SST, polas súas siglas en inglés), tras a conclusión do período obrigatorio de notificación ao Congreso de 45 días", anunciou o secretario de Estado, Marco Rubio, nun comunicado.
Washington anunciou tamén que deixa de considerarse a Hayat Tahrir al-Sham (HTS) como "organización terrorista global". O seu exlíder Ahmed al-Sharaa é o actual presidente sirio.
