Sen balizas nas praias de Cangas

Unha vintena das principais praias de Cangas non teñen balizas que sinalan o límite das embarcacións para achegarse á costa. Os usuarios están preocupados polo risco que isto supón. Din que o risco multiplícase, sobre todo coas motos de auga.

O Concello tivo problemas para adxudicar o servizo de balizamento, e non precisan unha data concreta para facelo. Sen boias, segundo a lei, precísase unha distancia mínima de 200 metros dende a beira ata a posición do barco. Algo que segundo os bañistas non se está a cumprir. Din que xa houbo problemas en moitos areais. Todos inciden no risco que isto supón agora que se fan campamentos infantís e numerosas actividades deportivas. 

Na ría de Aldán multiplícanse estes meses as motos de auga e as embarcacions que fondean preto dos areais, que, sen as balizas, xa están causando problemas. A falla delas é un risco engadido para os servizos de socorrismo, que teñen que extremar a vixilancia nestas praias do Morrazo.