Veciños de Barro esixen máis seguridade na N-550 para evitar os continuos accidentes
Aseguran que os sinistros son moi habituais en varios cruzamentos perigosos
O Concello de Barro trasladou a Transportes a súa preocupación polas carencias estruturais desta estrada nacional
O cruzamento da Portela é un dos máis perigosos, segundo os veciños (TVG)
Os veciños de Barro levan tempo queixándose da inseguridade da estrada nacional 550 ao seu paso por este concello. É unha vía moi frecuentada e demandan medidas que eviten os numerosos accidentes que se producen nela. De xeito especial, din, nos tres cruzamentos onde se rexistran os sinistros máis graves.
Aseguran que no da Portela é frecuente ver incorporacións perigosas á vía ou equivocacións dos condutores ante sinalizacións que ás veces resultan enganosas.
Algo parecido ocorre noutros cruzamentos ou na intersección de Porráns, onde xa se rexistraron accidentes graves.
Os veciños de Barro e en xeral os usuarios da vía din que a nacional 550 é unha estrada moi frecuentada e demandan medidas que garantan a súa seguridade.
O Concello de Barro trasladou a Transportes a súa preocupación polas carencias estruturais desta estrada nacional e demanda que se implementen as medidas pendentes para garantir a seguridade dos seus usuarios.
