Santiago ultima a proposta técnica sobre o cobro da taxa turística

"O estudo entregaránolo con toda seguridade esta semana. É un estudo técnico-xurídico que nos dá, que lle pode dar á Xunta o marco legal en que establecer esa norma, pero mentres non recibamos ese estudo tampouco queremos pronunciarnos sobre o seu contido", explica Sindo Guinarte, concelleiro de Turismo de Santiago.

Esta semana a USC rematará o informe técnico que o Concello lle encargou sobre a viabilidade xurídica e económica de implantar unha taxa turística. Este é tan só un primeiro paso.

"Falaremos, loxicamente, unha vez coñecido o estudo, coas asociacións representativas do sector, falaremos cos grupos políticos e trataremos de ver se é posible unha proposta consensuada", apunta Xosé Sánchez Bugallo, alcalde de Santiago.

Dende a Unión Hostaleira Compostela amosan a súa desconformidade co tributo. A Asociación de Hostaleiros, pola contra, estaría de acordo, pero pon condicións: "A primeira, para que se empregarían os cartos recadados, e a segunda, ten que ser moi fácil de cobrar por parte do hostaleiro", di Thor Rodríguez, presidente da Asociación de Hostalaría de Santiago.

O tema, que está xerando moita expectación na cidade, é tan controvertido que nin os propios turistas se poñen de acordo.