Santiago, ateigado no día grande da Ascensión
A feira cabalar de Amio e o baile dos cabezudos, protagonistas da xornada
Na Alameda, as atraccións e os postos do polbo congregan as familias picheleiras
Tres xoves no ano son, que relocen máis ca o sol, e o da Ascensión é un deles.
Non falta de nada neste día de tradicións compostelás que arrincou de mañanciña coa feira cabalar de Amio e o regateo dos tratantes.
E dos cabalos de Amio aos das atraccións da Alameda. Toca que os pequenos gocen e os maiores rasquen o peto.
Os que non poden faltar neste día son os personaxes máis queridos da Ascensión, os cabezudos, que bailaron pola zona vella ante a mirada dun público multitudinario.
E despois do baile toca tomar o polbo na carballeira de Santa Susana. Aquí prevén cociñar unhas 3 toneladas, a 15 euros a ración. Un ritual que une moito.
E a xornada rematará cun prato forte, o concerto das Tanxugueiras ás nove na praza da Quintana. Un broche de ouro para a festa máis picheleira.
E a xornada rematará cun prato forte, o concerto das Tanxugueiras ás nove na praza da Quintana. Un broche de ouro para a festa máis picheleira.
