Pontedeume rememora as súas orixes medievais no XV Feirón dos Andrade
Os pasarrúas animaron o mercado e as prazas da vila, que estes días recibe miles de visitantes
Pontedeume regresou aos tempos da poderosa liñaxe dos Andradre e recreou a Revolta Irmadiña no inmellorable escenario das súas rúas empedradas, transitadas estes días por guerreiros, artesáns, orcos e bruxas.
A vila celebra a décimo quinta edición do seu feirón medieval cunha ambiciosa programación que fusiona pasado e presente. Fúndense os aromas no ambiente e entre a xente que curiosea acó e aló mestúranse personaxes que nos devolven a outras épocas.
Durante os tres días de festa, centos de visitantes soben e baixan as costas das rúas empedradas, engalanadas para a ocasión e animadas con pasarrúas, música e postos de artesanía e de alimentación.
Cada praza agocha algunha sorpresa. Hai xogos tradicionais, talleres creativos e atraccións para os máis pequenos. Tamén hai teatro e desfiles, como o que pechará á noite o mercado, na despedida do feirón dos Andrade.
