Mel, marmeladas e porco celta, na feira do cooperativismo de Boborás
Emprendedores das comarcas do Ribeiro e O Carballiño danse cita en Boborás para promocionar os seus produtos
Pretende promover este modelo empresarial para fomentar o emprego e a actividade económica no rural
Na feira do cooperativismo de Boborás atopamos, sobre todo, produtos locais, elaborados con materia prima da zona. O mel está moi presente, ao natural e transformado nos máis variados produtos.
"Temos velas feitas con mel e cera de abella, temos unha liña cosmética feita con produtos tamén derivados das abellas, como própole ou a propia cera", conta Andrea Regueiro, de Mel Raíña Celta.
Tamén está presente o leite, co que a cooperativa Loureiro leva seis décadas elaborando kéfir e requeixos artesáns.
"Nós seguimos mantendo aquel leite en bolsa, coma o que nos daban no colexio, de leite fresco", explica Francisco Vázquez, xerente da cooperativa Santa Mariña de Loureiro.
Segundo os datos da Xunta, o cooperativismo empresarial representa o 5% do PIB galego.
"Poñendo enriba da mesa o cooperativismo como fórmula de emprendemento, a nós o que nos interesa é que haxa emprendemento ligado ao territorio, con produtos da nosa terra, que xeran valor engadido e axuden a loitar contra o despoboamento", asegura José González, conselleiro de Emprego.
O proxecto da feira sectorial, promovido polo concello de Boborás, inclúe tamén asesoramento para aqueles que se animan a emprender no rural.
"Non só temos que pensar nos clientes que temos ao lado, que tamén son unha oportunidade, senón tamén nos que temos máis alá", di Dani Diéguez, da Cooperativa Apoio.
Derivados do porco celta da aldea modelo de Osmo ou marmeladas artesás son outros produtos que atopamos na feira.
