Santiago aproba a taxa turística, que entrará en vigor o 1 de outubro

A taxa turística será unha realidade en Santiago de Compostela a partir do 1 de outubro. Desde ese día, os establecementos terán que empezar a cobrala. O pleno municipal aprobou este tributo cos votos a favor do bipartito, BNG e Compostela Aberta, do PSOE e de concelleiros non adscritos e coa abstención do PP.

"Hoxe é un día crucial para o futuro dos veciños de Compostela. Esta corporación ten nas súas mans dar un paso decisivo que na práctica implicará comezar a equilibrar os custos que xeran a actividade turística na cidade", expuxo a concelleira de Turismo, Míriam Louzao.

A postura adoptada este xoves polas formacións foi a mesma que a adoptada na sesión de maio, na que esta cuestión se votou por primeira vez. O texto de entón sufriu dúas modificacións tras o período de alegacións e conversacións co sector hostaleiro. Por unha banda, fixouse como data da súa entrada en vigor o 1 de outubro, que antes se ía producir en canto se publicase a ordenanza.

Tamén se estableceu un prazo de seis meses para a creación da comisión encargada do seu seguimento, que asumirá o Foro de Turismo Sostible. Del formaran parte representantes da corporación municipal, representantes do sector e asociacións veciñais.

A Comisión encargarase, entre outras cousas, de seguir o destino da recadación, cuxo 80 % debe ser dirixido a accións de turismo sostible, segundo obriga a lei. Alí, asegurou Louzao, será tamén onde se debata a taxa ao excursionismo.

Cabe lembrar que a taxa turística en Galicia é en realidade unha recarga ao imposto galego de estadías turísticas, aprobado pola Xunta na Lei de medidas fiscais e administrativas, tras unha petición da capital galega e posterior negociación con ela. Esta normativa marca as pautas do seu cobro e establece que se aplicará a estadías de entre un e cinco días, con pagos que van desde o euro por día ata os 2,5.