Ruta de autocaravanas para descubir Galicia sobre rodas
Medio cento de vehículos percorren as catro provincias na IX Ruta Yakart
O turismo de autocaravanas medra ano tras ano, impulsado por persoas que buscan unha forma de viaxar máis libre, máis económica e máis conectada coa natureza.
Un ano máis, A Coruña foi o punto de partida da ruta Yakart, que durante dez días explora a paisaxe, a cultura e a gastronomía de Galicia nun percorrido polas catro provincias con parada final en Santiago de Compostela.
Pasaron a primeira noite asomados ao Atlántico, baixo a luz do faro Patrimonio da Humanidade. A Torre de Hércules enmarcou a saída da novena ruta de autocaravanas Yakart, este ano con preto de cincuenta vehículos e máis de cen viaxeiros dispostos a deixarse sorprender por Galicia.
"Agardamos coñecer Galicia para poder vir máis veces. Faláronnos moi ben da gastronomía e da xente, que é encantadora", comenta Manuel, un caravanista gaditano que viaxa coa súa muller e coas súas cadelas.
Para moitos dos caravanistas esta será a súa primeira incursión en terras galegas. Os que repiten con Yakart non lle atopan peros á ruta.
"Gústame todo. A gastronomía encántame, a paisaxe tamén... e esta frescura que hai aquí. Nós estabamos a corenta graos", dinos Rosa, que fai a ruta por cuarta vez.
Hoxe conducen con máximas de menos de vinte e cinco graos. Á noite acamparán en Barreiros para visitar mañá a praia das Catedrais, Ribadeo ou Viveiro. A Ribeira Sacra, Vilagarcía de Arousa e a illa de Ons tamén están no camiño.
A última etapa finalizará fronte á catedral de Santiago a próxima fin de semana.
