Remata a operación retorno da Ponte da Constitución
Viviron un dos días de máis movemento como punto de encontro de milleiros de viaxeiros na súa volta á casa tras a ponte
As vías galegas viviron unha xornada de máxima actividade. Tocaba emprender o camiño de regreso á casa.
"Agora volvemos a Bilbao, son seis horas e media, máis ou menos", di un dos viaxeiros.
As estacións de servizo, nun dos seus días de máis traballo, foron o escenario perfecto para estirar as pernas e repoñer forzas.
Nunha viaxe longa por estrada como as desta ponte é moi importante para e descansar, unha pausa que serve tanto para estirar as pernas como tamén para vivir as vivencias destes días. As estacións de servizo foron este luns un auténtico fervedoiro de historias que veñen e que van.
"Quedamos cos días que pasamos cos amigos. Trátase de ir coñecendo pouco a pouco os sitios de Galicia", conta un matrimonio que aproveita para facer unha pausa nunha estación de servizo de Guitiriz. Outra viaxeira rememora que visitou Sanxenxo, Pontevedra, Vigo e A Toxa, mentres outro engade que tamén foron ata Valença do Minho.
Pero despois da ponte, toca volver á casa. A ponte comézase con ilusión e a volta á casa, con melancolía. O mellor é pensar que xa falta menos para a seguinte.
