Renfe suprime nove servizos no eixo atlántico pola ausencia de maquinistas
Asegura que este luns faltan catro traballadores con base en Vigo de xeito simultáneo e sen "previo aviso"
A compañía organizou un plan alternativo de transporte por estrada para asegurar a mobilidade
Renfe comunicou que debido á "ausencia simultánea" e sen "aviso previo" de catro maquinistas con base en Vigo, viuse obrigada a suprimir nove servizos ferroviarios previstos para este luns, 20 de abril, en Galicia.
Segundo explica a compañía, "a non dispoñibilidade destes traballadores, unida á falta de aviso previo" deixou sen cubrir os servizos suprimidos, "malia os intentos" de Renfe por recolocar persoal.
A compañía organizou un plan alternativo de transporte por estrada para asegurar a mobilidade e reforzar a atención nas estacións. O afectado é o eixo atlántico (Vigo-Santiago-A Coruña), con maior impacto nas primeiras horas da mañá.
Trens afectados
Os trens afectados son os que tiñan previsto saír de Vigo cara a Coruña ás 5:08, 8:00 e 10:35; o Vigo-Santiago das 17:16; e os que ían circular en sentido oposto, da Coruña a Vigo, ás 8:00, 11:06 e 14:05 horas.
Tampouco operará o Santiago-Vilagarcía das 19:10 horas e o convoi que tiña previsto o traxecto de volta ás 20:35 horas.
Renfe lamenta as molestias e asegura que traballa para recuperar a normalidade do servizo no menor tempo posible.
