Renfe move ficha en Galicia, cun reforzo do Eixo Atlántico
Reforza con mil prazas extra a conexión con Galicia esta ponte festiva
Desde o martes pon en marcha o que bautizou como "Plan Galicia", un reforzo do Eixo Atlántico con máis prazas e novos servizos
Plataformas cheas de maletas e ganas de descansar. Turistas e non turistas mesturáronse esta mañá nas estacións do ferrocarril. Uns cos recordos frescos, outros coa ilusión do que queda por ver. Todos tiveron a súa disposición esta ponte máis de mil prazas de reforzo cara a Madrid en Renfe.
Os trens saían ateigados pero ninguén quedou en terra. Había asentos pero, iso si, houbo que collelos con tempo. E pagar un pouco máis.
O reforzo desta ponte é a antesala para a transformación da semana que vén. O martes Renfe activa o que chamou Plan Galicia. Novos trens, novos horarios e máis prazas: Novo tren matinal Vigo-A Coruña e novo servizo de regreso desde a cidade herculina.
Hai máis novidades. O tren madrugador Vigo-Madrid abre as súas prazas para vir a Santiago. E os viaxeiros do interior terán tres novas conexións semanais Ourense-Santiago-A Coruña.
Detrás deste cambio, a despregadura dos modernos trens Avril. As prazas aumentarán case un 25 por cento no Eixo Atlántico.
