Eliance, empresa encargada dos helicópteros da DXT e do 061, entra en preconcurso de acredores, segundo CCOO

Eliance, a empresa encargada da patrulla de helicópteros da Dirección Xeral de Tráfico (DXT) e do 061 en Galicia, declarouse en preconcurso de acredores, segundo indicou este venres a Sección Sindical de FSC-CCOO no Ministerio do Interior, que denuncia que afectará "gravemente" á seguridade viaria da cidadanía, xa que "volve poñer en perigo servizos esenciais da Administración Pública".

Desde o sindicato lembraron nun comunicado, que hai máis dun ano xa trasladou a súa preocupación acerca de que esta empresa privada arrastraba varios incumprimentos con diferentes administracións e enviou este venres unha carta ao ministro do Interior, Fernando Grande-Marlaska, trasladándolle estas preocupacións.

"Por parte de CCOO informamos da gravidade de abrir a porta de entrada a estas empresas para facer negocio con estas infraestruturas críticas do Estado e con estes servizos esenciais para a cidadanía, como sucede no caso da patrulla de helicópteros da DXT, patrulla con máis anos de servizo, por diante da da Policía e da Garda Civil, e só superada pola de Defensa", explicou na mencionada misiva.

En consecuencia, o sindicato denunciou que xa non voan as aeronaves das patrullas con base en Málaga, Sevilla e Santiago de Compostela, deixando "sen a vixilancia" diferentes áreas do territorio nacional.

Ademais, coa celebración do 65 aniversario da patrulla de helicópteros da DXT o próximo 2 de outubro, os helicópteros das bases de Madrid, Zaragoza e Valladolid participarán no desfile das Forzas Armadas, co que, en palabras de CCOO, tampouco esas zonas contarán con eses servizos para esa xornada.

Ante iso, só quedará operativa exclusivamente a patrulla de Valencia para cubrir as necesidades de vixilancia o luns, xusto o día no que finaliza a operación retorno pola ponte do Pilar.

O secretario da sección sindical de CCOO, Fernando García Castro, denunciou que a pesar dos seus esforzos para apuntar "o historial de conflitos que arrastraba Eliance", a xestión dos responsables do departamento ministerial e da DXT pode acabar co peche "dunha das patrullas de helicópteros máis lonxeva do Estado".

Contrato de 51 millóns de euros 

Para CCOO, a Unidade de Medios Aéreos e outras ferramentas de seguridade viaria da DXT demostraron "sobradamente" a súa utilidade como piares da prevención da seguridade viaria, xa que a partir de 1989 lograron reducir nun 80% o número de persoas falecidas en accidentes de tráfico.

O Ministerio do Interior adxudicou a Eliance un contrato por un importe de máis de 51 millóns de euros para facerse cargo da patrulla de helicópteros da Dirección Xeral de Tráfico.