Renfe engade máis de 4.600 prazas semanais nos trens entre a Coruña e Vigo
A medida aplicarase desde o 3 de novembro e suporá un incremento do 12% na dispoñibilidade de asentos
O corredor do Eixo Atlántico é o máis demandado do Estado, con máis de 5,3 millóns de viaxeiros anuais
Renfe aumentará desde o 3 de novembro máis de 4.600 prazas semanais nos trens de media distancia que cobren o servizo entre a Coruña e Vigo Urzaiz. Segundo informou a compañía, cada semana circularán 18 trens do modelo S121, con capacidade para máis de 550 pasaxeiros.
Esta medida permitirá incrementar un 12% a dispoñibilidade de asentos no Eixo Atlántico e reforzar os traxectos con maior ocupación nos días e franxas horarias de máis demanda.
Renfe destacou que esta ampliación permitirá atender de maneira máis eficiente o aumento de usuarios deste corredor, consolidado en 2024 como o máis utilizado do Estado, con máis de 5,3 millóns de viaxeiros ao ano.
A empresa subliñou tamén que o incremento de prazas contribuirá a fomentar o uso do transporte público fronte ao vehículo privado e, así, reducir o impacto ambiental.
