Renfe acorda adquirir 30 trens de alta velocidade por 1.362 millóns de euros

O Consello de Administración de Renfe Operadora acordou a adquisición de 30 novos trens de alta velocidade, cun orzamento de 1.362 millóns de euros, a maior contratación da historia da compañía. O inicio deste proceso de licitación aprobado este mércores inclúe a posibilidade de estender o pedido ata os 40 trens, que poderían alcanzar os 1.777 millóns, segundo informou Transportes.

Óscar Puente avanzou no Congreso que os trens poderán operar a unha velocidade de 350 km/h unha vez que a infraestrutura ferroviaria estea preparada para permitir o incremento da velocidade comercial. A liña Madrid-Barcelona, na que as obras comezan este ano, será a primeira na que se poida circular a 350 km por hora, o que permitirá enlazar as dúas cidades en menos de dúas horas.

Polo momento ningunha das compañías que operan a alta velocidade teñen maquinaria para circular tan rápido; a maioría do material rodante actual alcanza velocidades máximas de 300 quilómetros por hora. A compañía priorizará o prazo de fabricación e a dispoñibilidade de novas unidades para cumprir os prazos de entrega previstos: 5 unidades antes de 40 meses e toda a flota antes de 78 meses.

Así mesmo, Renfe explicou que as condicións fixadas na licitación establecen un ritmo de subministración dun novo tren cada mes e medio. No prazo de execución do contrato, que Puente avanzou que será de seis anos, inclúense tamén as respectivas pezas de parque dos trens. Estes novos trens permitirán a Renfe modernizar a súa flota, incrementar a oferta de prazas e afrontar así o forte crecemento da demanda previsto para os próximos anos.

Os trens serán de gran capacidade -un mínimo de 450 prazas distribuídas en dúas clases- e deberán contar con espazos accesibles para persoas con mobilidade reducida e para bicicletas, alén de servizos de restauración como cafeterías. Estes novos convois incorporarán as prestacións propias da tecnoloxía ferroviaria de última xeración e estarán construídos para operar en ancho estándar UIC de 1.435 mm e irán equipados cos sistemas de sinalización e control máis avanzados, entre eles ERTMS/ETCS, así como ASFA.

Para a adxudicación avaliaranse aspectos técnicos, económicos e de mantemento, o que permitirá poñer en valor as ofertas máis equilibradas en termos de eficiencia, dispoñibilidade e número de prazas, así como fiabilidade na operación e cumprimento dos fitos de entrega, sinala Renfe nun comunicado. O ministro Puente e o presidente de Renfe, Álvaro Fernández Heredia, visitaron nos últimos meses as fábricas de Siemens en Alemaña, de Hitachi en Italia e da chinesa CRRC, ademais das plantas en España de Talgo, CAF e Alstom.

A licitación estaba prevista inicialmente para o mes de febreiro pero o accidente de Adamuz (Córdoba), que custou a vida a 46 persoas, obrigou á compañía a aprazar a decisión.