Un paso máis para conectar Galicia por alta velocidade coa metade norte sen pasar por Madrid

O Ministerio de Transportes, a través do Adif contrata a redacción do proxecto para abordar a montaxe de vía da denominada U de Olmedo, unha conexión de 8,2 quilómetros entre a liña de alta velocidade Madrid-Valladolid e a de Madrid-Galicia, á altura desta localidade de Valladolid.

Esta obra fará posibles as viaxes transversais en alta velocidade pola metade norte do país, sen pasar por Madrid, informaron a Europa Press fontes ministeriais. O contrato de redacción do proxecto, adxudicado por 261.465 euros, concretará as actuacións necesarias para a montaxe da vía interior no bypass (a que unirá a vía 2 da liña Madrid-Valladolid coa vía 1 da liña Madrid-Galicia), co despregamento de todos os elementos que a compoñen (balasto, travesas, carril e desvíos), mentres se completa a construción da plataforma e as estruturas da conexión.

Desta forma, os traballos de montaxe de vía poderán licitarse unha vez finalice esta plataforma e as estruturas, que progresan segundo o calendario previsto. Pola súa banda, o Adif finalizou a construción da pérgola sobre a estrada CL-602, de tres dos catro pasos superiores, e un inferior, do baipás, que garanten a súa integración na contorna, a súa permeabilidade e a conexión a ambos os dous lados da liña. Tamén completou as drenaxes transversais da liña.

Alén da montaxe de vía, posteriormente, o bypass completarase coa súa electrificación, e o despregamento dos sistemas de sinalización, xestión de tráfico e comunicacións, que se materializarán mediante próximos contratos.

Coa adxudicación da redacción de proxecto da montaxe de vía, o Adif explicou que dá un novo impulso ao bypass de Olmedo que, con 8,2 quilómetros e 40 millóns de euros de investimento, constitúe unha estratéxica infraestrutura para a vertebración territorial, a transversalidade da maior rede de alta velocidade de Europa (4.000 quilómetros) e a mobilidade sostible.

Esta conexión posibilitará realizar traxectos de alta velocidade directos -sen cambiar de tren ou pasar por Madrid- entre Galicia e Valladolid, outras capitais castelás como Palencia e Burgos, e tamén con Asturias, Aragón e Cataluña. E, a medida que se completen as liñas de alta velocidade en construción, con Cantabria, Navarra e País Vasco.

O U de Olmedo enlaza, á altura desta cidade, os dous corredores de alta velocidade que unen Madrid coas capitais da metade norte do país, aproveitando o V que, á altura desa localidade, debuxa a bifurcación da liña de alta velocidade Madrid-Segovia-Valladolid para, por unha banda, seguir cara á capital castelá-leonesa e o norte e, por outro, cara a Zamora e Galicia.

A conexión realízase mediante un trazado recto con extremos en curva (de aí a súa forma de U), que enlazan con cada un dos dous corredores.