O texto pactado por PSOE, BNG e Sumar para transferir a AP-9 sae adiante coa oposición do PP
As emendas pactadas por PSOE, BNG e Sumar para articular unha lei orgánica para transferir a AP-9 a Galicia saíron adiante e foron aprobadas na reunión mantida no Congreso polo relatorio que traballa no texto.
Segundo varias fontes consultadas por Europa Press, todos os grupos apoiaron o acordo, fóra de PP e Vox, que votaron en contra.
O texto acordado inclúe a transferencia da titularidade da Autoestrada do Atlántico, aínda que o Goberno galego, co presidente Alfonso Rueda á fronte, xa suxerira que non contaría co apoio dos populares ao entender que rebaixa condicións económicas e "non ten nada que ver" coa lei que foi acordada pola unanimidade de todos os grupos con representación no Parlamento galego.
Aínda este martes, a conselleira de Vivenda e Planificación de Infraestruturas, María Martínez Allegue, pedía aos grupos que pactaran ese texto que reflexionaran sobre a súa redacción final porque "suprime condicións tan importantes como a asunción do incremento das bonificacións que fora comprometida polo Goberno".
"Queremos a transferencia pero non a calquera prezo", concluía Martínez Allegue.
Tras a aprobación do relatorio, o texto pasará á Comisión de Transportes e despois ao pleno do Congreso, onde, ao tratarse dunha lei orgánica, require da maioría absoluta (176 apoios) para poder ser aprobada -os grupos impulsores do acordo confían en que isto ocorra e sería factible se só se opoñen populares e Vox-.
A norma aínda tería que pasar polo Senado antes dunha luz verde definitiva.
