Intentan remolcar un barco con madeira que quedou varado en Ribadeo
Intentan remolcar un barco con madeira que quedou varado en Ribadeo
As manobras da tarde non tiveron éxito e haberá que agardar á vindeira preamar da madrugada
O Albiz, un barco de cen metros de eslora, propiedade do grupo Murueta, que ía cargado de eucaliptos, quedou encallado a primeira hora deste xoves a apenas cen metros do peirao de Ribadeo.
Todo indica que o incidente se debeu a unha manobra incorrecta, xa que, malia o seu tamaño, o buque xa atracara outras veces neste porto. O acontecido congregou numerosos veciños que querían ver como sacaban o barco.
Dous remolcadores de gran potencia intentaron durante toda a tarde empurrar o barco do banco de area en que se meteu, agardando pola preamar do serán.
Malia que agardaron, a marea subiu por completo pero non logrou que o barco collera flotación.
Tampouco axudou que buques e guindastres auxiliares descargasen parte do eucalipto que transportaba. Cómpre ver que fai a vindeira marea chea, que será de madrugada.
