Galicreques fai trinta anos con 60 funcións de compañías procedentes de doce países
O festival internacional de monicreques que se celebra en Santiago de Compostela ofreceu 16 estreas
Despediuse coa entrega do premio Galicreques a Enkarni Genua e a estrea do espectáculo Ephimeros de Nauta
Galicreques fai tres décadas abrindo a cidade ás mellores compañías galegas e internacionais para ofrecer as historias máis fantásticas ante un público que non se conforma.
"A obra era sobre unha nena que non quería medrar. E no espazo místico había remordementos, sentimentos e seres imaxinarios. Fixo unha viaxe espiritual e descubriu que medrar non era tan malo".
"Unha nena perdeu o can. Tiña un amigo imaxinario".
Foron máis de 60 funcións deseñadas para o público miúdo, pero con espectáculos tamén para mozos e adultos.
"Espectáculos en que a través de novas linguaxes se entusiasma a xente maior. Por sorte estase a incorporar moita xente nova, xente adulta ao teatro de bonecos", di Jorge Rey, director do festival.
O premio do festival recoñece o talento e a dedicación ao mundo dos monicreques. A homenaxeada é Enkarni Genua, cofundadora do grupo Txotxongilo Taldea.
"Por unha vida de dedicación aos monicreques, á educación, ao éuscaro, a levar os títeres ás escolas, a cada vila... Porque nós principalmente traballamos no país vasco e en éuscaro", asegura Enkarni Genua, premio Galicreques 2025.
Galicreques é un escaparate do que se está a facer nos teatros de monicreques de medio mundo e tamén un punto de encontro para os que lles dan vida aos bonecos.
