Redondela convértese esta fin de semana nun grande escenario internacional de monicreques
Trinta compañías de teatro de todo o mundo e os nomes propios da elite das marionetas están xa en Redondela para concorrer neste Festival Internacional de Monicreques que vai xa pola súa edición número vinte e seis
Nesta edición unha das estrelas internacionais é Mario Ezno, un monicrequeiro da nova xeración que ten cinco millóns de seguidores nas redes, así como os brasilerios de Mamulengo Presepada
Redondela será toda esta fin de semana o centro do mundo dos monicreques. Ademais dos espectáculos dos monicacos na rúa e en distintas salas, na Alameda da vila xa está instalado o clásico mercado.
Desde o pasado luns as escolas do concello xa tiveron programación de fantoches e desde hoxe os espectáculos están xa na rúa. O tiro de saída deste festival deuno Danthea Teatro. E como todos os anos na Alameda está xa en marcha o mercado con postos onde comprar e ver as tendencias deste sector das marionetas.
'Polichinela, titor de Pierrot', a cargo de Danthea Teatro, foi o primeiro espectáculo na rúa. O escenario, a rebotica do palco da música. E a duración, 45 minutos de risas e entretemento. Queda inaugurado pois o espírito da vixésimo sexta edición do Festival de Monicreques de Redondela.
"A espiritualidade 'titiriteira' que lle chamamos. Por iso hai pinceladas como algunha instalación de recreo, broches musicais, e temos dez escenarios espallados pola vila co tráfico cortado. ¿E iso que supón? Converter Redondela nun grande escenario internacional. É unha experiencia interfamiliar", conta a TVG Luis Crespo, o director do XXVI Festival Internacional de Monicreques de Redondela.
Porque ademais das trinta compañías teatrais, seleccionadas pola dirección do Festival con moito meiró e criterio, ademais das máis de setenta actividades programadas esta fin de semana, este festival vive na rúa e pola xente. Unha das novidades máis concorridas está sendo un retablo mecánico instalado aos pes do Concello. E ao seu carón o Mercado da Alameda, un clásico deste festival internacional.
"Está moi instaurado no que os veciños e a xente toda. E nos rapaces incluso. Eu teño rapaces que os seus pais compráronme os monicreques con catorce anos e veñen agora cos seus fillos a buscar os monicreques", relata Emi Pérez que ten un posto chamado 'Un mundo de fadas'.
"E lévoo no sangue porque o meu pai transmitiumo a min. Si que isto se transmite de pais a fillos e é algo moi fermoso que se manteña a tradición. E por iso desfruto tanto aquí, en Redondela", engade Juan Cruz, un dos integrantes da compañía arxentina de monicreques La pajarera.
E antes de todo, á mañá, compartindo o espazo en Redondela do festival de marionetas un grande oco para o Día das Letras galegas e as súas cantareiras, as que coma elas sustentaron a música e o idioma.
.png)
