Recuperan a casa grazas á solidariedade dos veciños

Raúl Sampedro guíanos pola súa nova vivenda, en Casardeita, parroquia de Macendo. Unha casa de dous andares, típica da comarca do Ribeiro, coa adega no baixo e a vivenda no andar superior, cun amplo corredor no que instalaron o único que rescataron do incendio, unha lavadora que acababan de mercar e aínda non estaba instalada.

Raúl Sampedro, vítima do incendio: "É duro. Non o material, senón os recordos, as fotos, cousas que eran dos meus avós. Todo ardeu. Os documentos...".

Foi o 24 de decembro. Andaban coas últimas compras da Noiteboa e, cando chegaron á casa, só atoparon ruínas. O lume devorou ata o teito, con todo o que había dentro. Raúl e os seus dous fillos, de 18 e 17 anos, levan desde entón vivindo da solidariedade dos seus veciños, que ata lles prestaron unha vivenda provisional.

"É como cambiar da noite ao día: a casa é nosa e temos un teito que nos dá seguridade. A xente comportouse de marabilla. Aínda hoxe chega xente con roupa, preguntando se nos fai falta algo", agradece Raúl.

A propietaria da nova casa tamén lles rebaixou o prezo. O primeiro que fixeron foi reparar as pingueiras do teito e renovar a instalación eléctrica, ante o medo de volver pasar polo mesmo. "Veu un técnico electricista, que revisou, instalamos enchufes novos, conectores...", comenta.

Retornado de Venezuela, o que lle preocupa agora a Raúl é o emprego. Ten tido traballos temporais, pero agora mesmo está sen ingresos, con dous fillos ao seu cargo.